Dobrowólne socialne lěto na polu kultury

 

Julija Korjeńkec                                                                 
Bywša dobrowólna w socialnym lěće na polu kultury 
 
Po tym zo zakónčich po 12 lětach swój šulski čas z maturu na serbskim gymnaziju, přebywach hišće dalše lěto w Budyšinje, drje nic na gymnaziju, ale w Rěčnym centrumje WITAJ a pola młodźinskeho towarstwa PAWK z. t. Tu wukonjach Dobrowólne socialne lěto na polu kultury.
 
Čehodla so runje tu požadach?
 
Rozmołwjach so husćišo z FSJ-nikami, kotřiž do mnje tu skutkowachu a wobdźělach so rady na zarjadowanjach PAWKa. Tak dóstach lóšt, so sama na polu projektoweho managementa wuspytać. Dalša přičina běše, zo nochcych so po šuli hnydom zaso na šulsku ławku sydnyć. Tute lěto je dobra składnosć, so tak prawje wot šule wočerstwić a runočasnje kreatiwnje skutkować, t. r. ideje wuwiwać a zwoprawdźeć. Nimo toho móžach sej hišće jónu dokładnje wuwědomić, dokal měło w přichodźe hić ...
 
Što běchu moje nadawki?
 
Moje dźěłowe městno bě běrow młodźinskeho towarstwa PAWK. Tam mějach so zhromadnje z koordinatorku/-om wo zarjadniske naležnosće starać. Zdobom běch jedna z kontaktnych wosobow za towarstwo.
 
Organizowachmy zarjadowanja kaž
  • nócnej wolejbulowej turněraj w nowembru a aprylu w Chróšćanskej Jednoće,
  • turněr Poker-Serb w měrcu w Chróšćanskim młodźinskim klubje.
Skutkowach pak tež jako pomocnica při zarjadowanjach RCW za šulerjow, kaž na přikład
  • při swjedźenju serbskeje rěče,
  • w prózdninskim campje,
  • při čitanskim wubědźowanju a
  • při čitanskej nocy.
Mój zakónčacy projekt
 
Wjeršk mojeho lěta běše stanowe lěhwo pola mjeńšiny Sewjernych Frizow za šulerjow 6. a 7. lětnika w juliju 2009. Při tutym projekće móžach wšitko to nałožować, štož běch w běhu lěta nawuknyła:
  • projekt wobsahowje a organizatorisce planować,
  • financy planować,
  • z wotpowědnymi flyerami direktnje w šulach kaž tež přez informacije a interviewy w rozhłósu a nowinje wabić,
  • team přewodźerjow zestajić,
  • staršich w formje listow a staršiskeje zhromadźizny informować,
  • šulerjow přez cyły tydźeń přewodźeć,
  • financy wotličić a
  • projekt wuhódnoćić.

Kubłanske dny

Dobrowólne socialne lěto wobsahuje 25 kubłanskich dnjow. Z toho organizuje nošer 20 dnjow w formje štyrjoch tydźenskich seminarow k slědowacym temam centralnje:

  • projektowy management – praktiske dźěło we wobłuku kultury
  • powołanska orientacija a rjadowanje žiwjenja
  • interkulturelne wuknjenje
  • rozestajenje z towaršnostno- a socialnopolitiskimi temami.
 Zbytnych pjeć dnjow sym sej na dwě dalekubłani rozdźěliła:
  • seminar za dźěło z programom Photoshop
  • seminar za dowolnosć nawjedowanja dźěći a młodostnych (Jugendleitercard)
Što je mi lěto přinjesło?
 
W tutym lěće sym jara wjele nawuknyła a nazhoniła. Sym tójšto nowych a zdźěla přewšo zajimawych ludźi zeznała a přećelow zdobyła. Tak zeznachmy tež města, w kotrychž přebywachmy. Hač bě to městačko Pirna-Liebethal ze swojimi romantiskimi kućikami, měšćanska ralley po Budyšinje, při kotrejž podachmy so mjez druhim na slědy Serbow, wjedźenje přez pólske město Wrócław abo wosebity flair studentskeho města Lipsk – za kóždeho bě něšto pódla.
Štož na seminarach wězo njesmě falować, su rjane zhromadne wječorki, kotrež kóždy po swojich zamóžnosćach sobu wuhotuje. Instrumentalisća hraja na swojich instrumentach – hač na gitarje, bubonje, saksofonje, klawěrje abo klarineće –, druzy spěwaja, rejuja abo so na druhe wašnje do zhromadnosće zapřijeja.
Centralna tema dobrowólneho socialneho lěta na polu kultury 2008/2009 rěkaše „Za prawym přistawom pytać“. To rěka, zo hodźi so tute lěto přirunować z jězdźenjom po morju. Hižo temy seminarow pokazuja, kak će tute lěto kubła. Chce wosobinske wuwiće spěchować a při powołanskej orientaciji podpěrać, potajkim do praweho přistawa wjesć. Běchmy namórnicy na samsnej łódźi a podachmy so lěto na zhromadny kurs, doniž kóždy swój přistaw njenamaka.
Mój přistaw su nětko Drježdźany. Tam wukubłam so na asistentku za hotelowy management.
Dokelž pak nochcu dźěło w PAWKu spušćić, skutkuju wot nazymy w předsydstwje towarstwa.
 
Komu FSJ kultura doporučam?
 
Lěto so za kóždeho hodźi, kotryž
  • ma kreatiwne ideje,
  • rady projekty planuje, organizuje a přewjedźe,
  • rady z ludźimi dźěła, 
  • je hibićiwy a fleksibelny.
Dźak
 
Dźakuju so wšitkim, kotřiž su mi tute lěto zmóžnili, mje přewodźeli a podpěrali.