Projekty w Hornjej Łužicy

 

Poskitki za dźěći w starobje 2 do 7 lět

Znaty serbski klankodźiwadźelnik Měrćin Krawc předstaješe klankodźiwadłowe hry z Witkom pěstowarskim a šulskim dźěćom. Nimo toho je jedna hra tež na DVD wušła.
 
Swójbny dźeń
Dwójce wob lěto zetkawaja so wšitke zajimowane swójby, kotrychž dźěći so na projekće WITAJ wobdźěleja abo dwurěčnje wotrostu, k zhromadnym aktiwitam a k wuměnje nazhonjenjow.


Poskitki za šulerjow lětnikow 1 do 4

Čitanska nóc
W zhromadnym dźěle z Němsko-serbskim ludowym dźiwadłom přewjeduje Rěčny centrum WITAJ za šulerjow 3. a 4. lětnika kóždolětnje čitansku nóc w Budyskim Dźiwadle na hrodźe. Nimo wjele rjanych knihow dožiwjeja šulerjo tež małe literarne kruchi na jewišću.

Čitanske wubědźowanje
"Knihi su zastupny lisćik do raja fantazije", tak wabi so na čitanske wubědźowanje za šulerjow 3. lětnika serbskich zakładnych šulow resp. zakładnych šulow, kotrež po koncepciji 2plus dźěłaja. Wšitcy šulerjo su namołwjeni, so aktiwnje ze serbskej dźěćacej literaturu zaběrać.

Dźěćacy program na Mjezynarodnym folklornym festiwalu Łužica
Wot lěta 2001 organizuje a přewodźa Rěčny centrum WITAJ dźěćacy program we wobłuku Mjezynarodneho folklorneho festiwala Łužica ze zaměrom, zajim dźěći za serbsku kulturu a rěč zbudźić.

Prózdninski camp
Šulerjo dwurěčnych rjadownjow zakładnych šulow z přewažnje němskeho wobswěta přežiwja zhromadnje ze serbskimi dźěćimi tydźeń w nazymskich prózdninach. Při zhromadnych hrach a předewzaćach so zeznaja, nałožuja swoje serbskorěčne znajomosće a rozšěrjeja tak swój słowny skład.

Projekt "Fit a sylni w žiwjenju"
Dwurěčny prewentiwny projekt poskićuje Rěčny centrum WITAJ zhromadnje ze Syću za dźěćace a młodźinske dźěło Biskopicy zakładnym šulam a hortam. Dźěći rozestajeja so z temomaj "Rěč ćěła" a "Kurjenje a dychanske organy".

Swjedźeń serbskeje rěče
Šulerjow štwórtych lětnikow, kotřiž w šuli serbšćinu jako cuzu rěč wuknu, přeprošuje Rěčny centrum WITAJ kóždolětnje na poslednjej septemberskej srjedźe do Radworskeje Serbskeje zakładneje šule, zo bychu so w małych, měšanych skupinkach při wšelakich stacijach ze serbskej rěču a kulturu zaběrali.

 


Poskitki za šulerjow lětnikow 5 do 10


Comicowe wubědźowanje
Wšitcy šulerjo mjez 10 a 18 lětami su kóžde druhe lěto namołwjeni, so na comicowym wubědźowanju wobdźělić, z tym zo swojim stawizničkam we wobrazach serbske teksty podkładu.

Dny serbskeho dźěćaceho dźiwadła
Šulerjo z Hornjeje a Delnjeje Łužicy dźěłaja we wšelakich workshopach dwaj dnjej hromadźe z dźiwadźelnikami Budyskeho Serbsko-němskeho ludoweho dźiwadła. Při tym so intensiwnje ze serbskej jewišćowej rěču rozestajeja.

Serbski "Schlingel"
We wobłuku Mjezynarodneho filmoweho festiwala "Schlingel" přeprošuje Rěčny centrum WITAJ šulerjow do Kamjenicy na festiwal. Wubrane filmy so pozdźišo w zhromadnym dźěle z SAEK serbsce synchronizuja.

Staflowy běh wo pokal Płomjenja
Kóžde lěto znowa namołwja redakcija dźěćaceho časopisa “Płomjo” serbskich šulerjow 5. do 8.  lětnikow serbskich wyšich šulow a Serbskeho gymnazija Budyšin k wobdźělenju na wubědźowanju stafloweho běha. Tute wotměwa so kóždolětnje w oktobru na Ralbičanskim sportnišću. Kóžde holče abo hólče staflowe mustwo wobsteji stajnje z jednoho šulerja / jedneje šulerki kóždeho lětnika. Dobyćerske mustwo smě pokal Płomjenja na jedne lěto sobu domoj wzać.

 


Poskitki za šulerjow lětnikow 11 a 12

Projekty w Internaće Serbskeho gymnazija
Přez zhromadne projekty je internatnym wobydlerjam móžno, serbske kulturne wjerški sobu wuhotować, serbske nałožki a kulturu pěstować a tak charakter Serbskeho gymnazija a k njemu słušaceho internata jako serbske kulturne srjedźišćo pěstować.

 


Poskitki za wšitke starobne skupiny

Specifiske poskitki při šulskich swjedźenjach a projektach
Serbskorěčne projekty na šulach so po potrjebje wobsahowje, organizatorisce a personalnje podpěruja. K spjelnjenju tutych nadawkow wudźeržuje Rěčny centrum WITAJ kontakty ke kubłanišćam, serbskim institucijam, studentam a młodostnym.

Swójbna schadźowanka

Na poslednjej njedźeli zymskich prózdnin přeprošujetej Rěčny centrum WITAJ a Domowinska župa "Michał Hórnik" serbsku dźěćinu a staršich do wjacezaměroweje hale w Chrósćicach. Zabawne popołdnjo zahaji so z programom, do kotrehož so dźěći sobu zapřijeja. W najwšelakorišich poskitkach – wot sportowych, paslenskich, pomolowanskich hač k serbskorěčne znajomosće wužadacym, eksperimentowy abo komputerowym – móža so dźěći mjezsobu zeznać a so zhromadnje zabawjeć. Staršim pak poskićuja so nimo swačiny wšelake poradźowanja.

Wopyt Rěčneho centruma WITAJ
Sobudźěłaćerjo Rěčneho centruma WITAJ předstajeja šulerjam jich starobje wotpowědujo swoje dźěłowe wobłuki. W formje małych projektow zhonja, kak so na přikład wučbnica zhotowja abo kak dźěćacy časopis "Płomjo" nastawa.