Čitanske wubědźowanje

12. čitanske wubědźowanje

Najlěpši čitarjo pochadźeja z Chrósćic a Radworja

Filip Budar ze Serbskeje zakładneje šule “Jurij Chěžka” Chrósćicy a Marlene Jatzwaukec ze Serbskeje zakładneje šule „dr. M. Grólmusec“ Radwor staj dobyćerjej 12. čitanskeho wubědźowanja, kotrež wotmě so sobotu, 9. apryla 2016, w Budyskej Smolerjec kniharni.

Filip Budar wudoby sej 1. městno w skupinje serbskich maćernorěčnych šulerjow a Marlene Jatzwaukec w skupinje šulerjow měšanorěčneho pochada. Na wurisanju wobdźělichu so cyłkownje 22 najlěpšich čitarjow 3. lětnika serbskich zakładnych šulow, kaž tež z Wojerec a Slepoho.

Zaměr wubědźowanja pod motom „Knihi su zastupny lisćik do raja fantazije“, kotrež Rěčny centrum WITAJ z podpěru Ludoweho nakładnistwa Domowina přewjeduje, je, šulerjow hižo zahe k čitanju serbskich dźěćacych knihow wuwabić a jim scyła bohatosć serbskeje literatury zbližić.

Wšitcy wobdźělnicy mějachu najprjedy publikumej z knihi tekst předčitać, kotryž su sej sami wuzwolili a doma hižo nazwučowali. Najwoblubowaniše běchu při tym knihi Jěwy-Marje Čornakec z powědančkami wo žabce Šlapce, myšce Pip a jěžiku Kałačiku, ale tež knihi awtorow Lubiny Hajduk-Veljkowićoweje a Jurja Kocha. Serbscy maćernorěčni šulerjo čitachu hišće dalši – njeznaty – tekst z knihi Jěwy-Marje Čornakec „Zmiječk Paliwak“. Tež tutón nadawk wulkotnje zmištrowachu.

01020304050607080910111314151617181920212223242526272829303132333435363738394041