Klankodźiwadło

"Pintlašk" dźěći zahorił

Na swojej turneji po serbskich pěstowarnjach a zakładnych šulach móžeše klankodźiwadźelnik Měrćin Krawc zaso wjace hač 800 wulkich a małych přihladowarjow na swoje předstajenja witać. Za kóždeho z nich běše hra "Pintlašk" wosebite zetkanje z klankami a z mjeztym hižo 75-lětnym klankarjom.

Wosebje wjeselo na hrě a nałožowanje serbskeje rěče ležitej Měrćinej Krawcej a jeho sobuhrajerce Borborje Markowej na wutrobje. To začuwaja wšitcy, kiž smědźa angažowaneju hrajerjej dožiwić. Z wjele lubosću dźěłataj za a před kulisami z młodymi přihladowarjemi a wubudźataj spontane dialogi mjez dźěćimi a klankami. Tež hdyž kóžde dźěćo hišće serbsce njewotmołwja, swědča tola reakcije přihladowarjow wo tym, zo su serbske słowa hrajerja zrozumili.

Pozitiwne dožiwjenje, kiž maja dźěći na klankodźiwadłowych předstajenjach, je jim wočiwidny pohon serbšćinu wuknyć a nałožować.

 

 


"Witko a paduch"

W Rěčnym centrumje nasta před někotrymi lětami identifikaciska symboliska figura za WITAJ-projekt z mjenom Witko. Z toho časa je Witko dźěćom w serbskich a WITAJ-pěstowarnjach a pěstowarnjach z WITAJ-skupinami znaty a při zaběrach a hrajkanju woblubowany serbskorěčny partner. Wosebje požadane su w tutym zwisku nastate dźěćace spěwy a sceny ze wšědneho žiwjenja Witka, kotrež smy za kubłarki jako didaktiski material wuwili a kiž  jim ke kubłanskemu dźěłu doporučamy. Dźěći njeznaja Witka jenož jako ručnu klanku, ale mjeztym tež jako centralnu figuru w informaciskim zešiwku "Lutki" a z předšulskeho zešiwka "Mój pisany předšulski zešiwk".

W prócowanju Rěčneho centruma WITAJ wo šěrše zapołoženje Witka zwažichmy so z fachowcami a praktikarjemi na nowe puće. W zhromadnym kreatiwnym dźěle z wučerjom a kulturnikom Jandytarjom Hajnkom a Budyskim klankarjom Měrćinom Krawcom nasta nowa serbskorěčna klankodźiwadłowa hra z titulom "Witko a paduch". Hra so rěčnym zamóžnosćam WITAJ-dźěći přiměri.
 
Klankodźiwadłowa hra měješe 17. měrca 2009 na žurli Serbskeho domu w Budyšinje swoju prapremjeru. Jako hosći móžachmy na prěnim předstajenju dźěći WITAJ-skupinow pěstowarnje "Słónčny kućik" z Bukec kaž tež pěstowarnjow "Pjerachowy kraj" a "Jan Radyserb-Wjela" z Budyšina witać. Premjerje přizamkny so klankodźiwadłowa turneja k dźěćom pěstowarnjow z WITAJ-skupinami. Cyłkownje předstaji so klankodźiwadło 16 króć w pěstowarnjach. Přihladowarjo – dźěći a kubłarki, starši kaž tež dźědojo a wowki – mějachu napjate a wokřewjace dožiwjenja z Witkom a jeho přećelemi kačku Nakanaka a husańcu Wakawaka, kotřiž z lesću a wušiknosću paducha Himpaka popadnu a rubjenstwo lubowanej wowce zaso wróća.
 
Awtorej poradźi so, napjatu stawizničku z humorom powědać a ju z wjesołymi a žortnymi spěwami a hrónčkami wobohaćić. Dźěći předstajenje ze zahoritosću a z mócnym přikleskom přiwzachu.