Prózdninski camp

Prózdninski camp w Budyšinje

W prěnim tydźenju nazymskich prózdnin - wot 4. hač do 7. oktobra 2016 - knježeše w Budyskej młodowni "Garbarska bašta" čiłe žiwjenje, jako přebywaše tam 18 serbskich a serbsce wuknjacych dźěći ze šulow Wojerecy, Slepo, Radwor, Chrósćicy, Worklecy a Pančicy-Kukow w prózdninskim campje.

Hižo k 15. razej bě Rěčny centrum WITAJ šulerjow 3. a 4. lětnika na zhromadny prózdninski tydźeń přeprosył. Spěšnje so dźěći wšelakich šulow mjezsobu spřećelichu. Do programa campa słušachu wopyt Serbskeho muzeja w Budyšinje, Krabatoweho młyna w Čornym Chołmcu a Röhrscheidtoweje kupjele kaž tež wjedźenje pod plestrom a po wěžach Sprjewineho města.

Nimo toho pućowachu, paslachu a hrajachu dźěći wjele a běchu tak husto kaž móžno na čerstwym powětře.

Přespěšnje minychu so dny. Mučni ale zbožowni zapakowachu dźěći pjatk dopołdnja nimo swojich mazanych drastow tež rjane dopomnjenki na zhromadne dožiwjenja do swojich wačokow – tón jedyn abo tamny tež adresu z přećom na bórzomne zasowidźenje.

010203040506070809101112131415161718192021222324252627282930313233343536373839404142