Maćernorěčni Serbja w pěstowarnjach

 

Dokelž njejsu WITAJ-kubłarki Delnjeje Łužicy maćernorěčne Serbowki, ale su sej serbšćinu hakle w rěčnym kursu přiswojili, su dźakowne za kóždužkuli podpěru, kotruž wot  maćernorěčnych Serbow a Serbowkow dóstawaja. Dźakowano spěchowanju Braniborskeho ministerstwa za šulstwo, młodźinu a sport přewjeduje Rěčny centrum WITAJ wot apryla 2001 naprawu "Efektiwne posrědkowanje delnjoserbšćiny w pěstowarskim wobłuku".

We wobłuku projekta wopytuja maćernorěčni Serbja/Serbowki a serbsce rěčacy praktikanća/praktikantki prawidłownje WITAJ-skupiny w pěstowarnjach a dawaja na tute wašnje drohotne swojoraznosće swojeje rědko wustupowaceje maćeršćiny dźěćom a pěstowarkam dale. Woni powědaja dźěćom bajki, spěwaja, rymuja, pasla a hrajkaja sej z nimi, wužiwajo při tym wězo stajnje serbšćinu. Za dźěći je wažne, zo dožiwja, zo tež ludźo zwonka jich kubłanišća serbsce rěča. Nimo toho přinošuja maćernorěčni Serbja tež rěčnemu wukmanjenju kubłarkow a pomhaja kubłarkam při nadźěłanju didaktiskich materialijow.